១០ សីហា ២០១៥
កាលពីថ្ងៃទី១០ ខែសីហា ឆ្នាំ២០១៥ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាបានអនុញ្ញាតឱ្យលោក Martin Dinkelborg ប្រធានមជ្ឈមណ្ឌលសហប្រតិបត្តិការបច្ចេកទេសធនាគារកណ្តាល ចូលជួបសម្តែងការគួរសម និងពិភាក្សាពីការពង្រឹងកិច្ចសហប្រតិបត្តិការរវាងធនាគារជាតិនៃកម្ពុជានិងធនាគារកណ្តាលអាល្លឺម៉ង់ ។ ឆ្លៀតក្នុងឱកាសនោះដែរ លោក Martin Dinkelborg ក៏បានធ្វើបទបង្ហាញជូនដល់មន្ត្រីធនាគារជាតិនៃកម្ពុជាស្តីពីធនាគារកណ្តាលអាល្លឺម៉ង់ និងកិច្ចសហប្រតិបត្តិការបណ្តុះបណ្តាលអន្តរជាតិ ។ ចាប់តាំងពីឆ្នាំ២០០០មក ធនាគារជាតិនៃកម្ពុជាបានពង្រឹងកិច្ចសហប្រតិបត្តិការយ៉ាងល្អប្រសើរជាមួយធនាគារកណ្តាលអាល្លឺម៉ង់ ដើម្បីកសាងនិងពង្រឹងសមត្ថភាពជំនាញរបស់ធនាគារជាតិនៃកម្ពុជា ។ រហូតដល់បច្ចុប្បន្ន មានមន្ត្រីធនាគារជាតិនៃកម្ពុជាចំនួន ១៨៧រូប បានទទួលវគ្គបណ្តុះបណ្តាលសិក្ខាសាលារបស់ធនាគារកណ្តាលអាល្លឺម៉ង់លើជំនាញនានា និងមានសិក្ខាសាលាចំនួន ២០ ត្រូវបានរៀបចំនៅធនាគារជាតិនៃកម្ពុជា ដោយមានជំនាញការចំនួន ២៧រូប ធ្វើបទបង្ហាញ ។
