១២ សីហា ២០១៥
ដោយមានការណែនាំដ៏ខ្ពង់ខ្ពស់របស់ សមេ្តចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៨ ខែតុលា ឆ្នាំ២០០៩ ក្នុងឱកាសប្រារព្ធ ខួបអនុស្សាវរីយ៍លើកទី៣០ នៃការបង្កើតធនាគារជាតិនៃកម្ពុជាឡើងវិញ ធនាគារជាតិនៃ កម្ពុជាបានរៀបចំសារមន្ទីរសេដ្ឋកិច្ចនិងរូបិយវត្ថុ ព្រះស្រីឦសានវរ្ម័ន ដើម្បីចងក្រងប្រវត្តិនៃការវិវត្តរីកចម្រើនប្រព័ន្ធធនាគារនិងហិរញ្ញវត្ថុ ព្រមទាំងតួនាទីធនាគារកណ្តាលនិងរូបិយវត្ថុ ក្នុងការរួមចំណែកអភិវឌ្ឍសេដ្ឋកិច្ចនិងសង្គមនៅកម្ពុជា ចាប់តាំងពីសម័យមុនអង្គររហូតដល់បច្ចុប្បន្ន ។
បច្ចុប្បន្នអគារសារមន្ទីរសេដ្ឋកិច្ចនិងរូបិយវត្ថុ ព្រះស្រីឦសានវរ្ម័ន កំពុងត្រូវបានសាងសង់ជិតរួចរាល់ហើយ ដែលមានទីតាំងស្ថិតនៅផ្លូវលេខ១០៦ សង្កាត់វត្តភ្នំ ខណ្ឌដូនពេញ រាជធានីភ្នំពេញ។
ដើម្បីពិនិត្យមើលលើវឌ្ឍនភាពនៃការសាងសង់ ក៏ដូចជាការរៀបចំគោលនយោបាយចម្បងៗក្នុងការអភិវឌ្ឍសារមន្ទីរ កាលពីថៃ្ងទី១២ ខែសីហា ឆ្នាំ២០១៥ គណៈកម្មការគ្រប់គ្រងសារមន្ទីរបានជួបប្រជុំជាលើកទី១ ក្រោមអធិបតីភាពរបស់
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ។
