២០ កញ្ញា ២០១៦
លោក តាន់ ស្រ៊ី ដាតូ ស្រ៊ី តៃអាងលាវ(Tan sri dato ' sri Tay Ah Lek) នាយកប្រតិបត្តិ របស់ធនាគារសាធារណៈម៉ាឡេស៊ីបានអះអាងឲ្យដឹងថា ខ្លួននឹងពិចារណាលើកការផ្ដល់ឥណទានឲ្យទៅក្រុមហ៊ុនស្រូវអង្ករ ពិសេសរោងម៉ាស៊ីនកិនស្រូវនានារបស់កម្ពុជាបន្ថែមទៀតតាមស្ថានភាពជាក់ស្ដែង ។
ការអះអាងប្រកបដោយការប្ដេជ្ញាចិត្តខ្ពស់របស់លោកនាយកប្រតិបត្តិរបស់ធនាគារសាធារណៈម៉ាឡេស៊ី រូបនេះបានធ្វើឡើងកាលពីល្ងាចថ្ងៃទី ១៩ កញ្ញា ម្សិលមិញនេះនៅក្នុងឱកាសដែលលោកបានដឹងនាំក្រុមការងាររបស់ខ្លួនចូលជួបសម្ដែងការគួរសមនិងពិភាក្សាការងារជាមួយ ឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជា ។
នៅក្នុងឱកាសនោះដែរ ឯកឧត្ដម ជា ចាន់តូ បានបញ្ជាក់ឲ្យលោក តាន់ស្រ៊ី តៃ អាង លាវ(Tan sri Tay Ah Lek) បានដឹងអំពីភាពរីកចម្រើនិងស្ថានភាពនៃការរក្សាបាននូវកំណើនសេដ្ឋកិច្ចរបស់កម្ពុជានាពេលកន្លងមកនេះ ។ ជាមួយនេះដែរឯកឧត្ដម ទេសាភិបាលធនាគារជាតិនៃកម្ពុជា ក៏បានបញ្ជាក់អំពីស្ថានភាពនៃសុខភាពដ៏ល្អក្នុងវិស័យធនាគាររបស់កម្ពុជាឲ្យបានដឹងផងដែរ៕
