២២ វិចិ្ឆកា ២០១៦
កាលពីថ្ងៃទី២២ ខែវិច្ឆិកា ឆ្នាំ២០១៦ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអនុញ្ញាតឱ្យឯកឧត្តម Serge Kolb ទេសាភិបាលរងធនាគារកណ្តាលលុចសំបួ ចូលជួបសម្តែងការគួរសម និងពិភាក្សាការងារនៅធនាគារជាតិនៃកម្ពុជា ។ឆ្លៀតក្នុងឱកាសបំពេញទស្សនកិច្ចនេះ ឯកឧត្តម Serge Kolb បានធ្វើបទឧទ្ទេសនាម ស្តីពី "ការប្រឈមនិងកាលានុវត្តភាពសម្រាប់សេដ្ឋកិច្ចប្រទេសកម្ពុជា" ជូនថ្នាក់ដឹកនាំនិងមន្ត្រីរបស់ធនាគារជាតិនៃកម្ពុជា ។ ឯកឧត្តម Serge Kolb សង្គត់ធ្ងន់លើការពិភាក្សាអំពី ៖ ១/- សារៈសំខាន់ក្នុងការធ្វើបដិដុល្លារូបនីយកម្ម ២/- កំណើនឥណទាន និងទីផ្សារអចលនទ្រព្យ ព្រមទាំងគោលយោបាយម៉ាក្រូប្រុងប្រយ័ត្ន ក្នុងតំបន់អាស៊ី និងតំបន់អឺរ៉ូ និង ៣/- ការធ្វើពិពិធកម្ម និងឧត្តមភាពប្រកួតប្រជែងរបស់កម្ពុជា: គោលនយោបាយរយៈពេលមធ្យម និងវែង ។
ធនាគារជាតិនៃកម្ពុជា និងធនាគារកណ្តាលលុចសំបួ បានពង្រឹងកិច្ចសហប្រតិបត្តិការល្អចាប់តាំងពីដើមទស្សវត្សរ៍ឆ្នាំ២០០០មក ហើយតាមរយៈ នេះធនាគារកណ្តាលលុចសំបួ បានផ្តល់អាហារូបករណ៍ថ្នាក់អនុបណ្ឌិតផ្នែកហិរញ្ញវត្ថុជារៀងរាល់ឆ្នាំ និងផ្តល់ឱកាសឱ្យដល់មន្ត្រីបុគ្គលិកធនាគារជាតិនៃកម្ពុជា បានធ្វើកម្មសិក្សានៅធនាគារកណ្តាលលុចសំបួ លើការងារចម្បងៗរបស់ធនាគារកណ្តាល ។
