០២ ធ្នូ ២០១៦
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជាបានចូលរួមកិច្ចប្រជុំលើកទី ១១ នៃក្រុមប្រឹក្សាស្ថិរភាពហិរញ្ញវត្ថុថ្នាក់តំបន់សម្រាប់តំបន់អាស៊ីនៅថ្ងៃទី០២ ខែធ្នូ ឆ្នាំ ២០១៦ នៅទីក្រុងហុងកុង ។ ក្នុងកិច្ចប្រជុំ លោកជំទាវ បានធ្វើបទបង្ហាញស្តីពីឥទ្ធិពលនៃបច្ចេកវិទ្យាផ្នែកហិរញ្ញវត្ថុលើការទូទាត់រាយ ដែលបានលើកកម្ពស់ បរិយាប័ន្នហិរញ្ញវត្ថុ ការប្រើប្រាស់រូបិយវត្ថុក្នុងស្រុក និងសមាហរណកម្មក្នុងតំបន់ ។ ស្របពេលជាមួយគ្នានេះ ការរីកចម្រើនបច្ចេកវិទ្យាផ្នែកហិរញ្ញវត្ថុបាននាំមកនូវហានិភ័យថ្មីៗបន្ថែមទៀត ដែលទាមទារឲ្យមានការដាក់ចេញបទប្បញ្ញត្តិសមស្រប ក្នុងទិសដៅរក្សាតុល្យភាពរវាងបរិយាប័ន្នហិរញ្ញវត្ថុ ភាពងាយស្រួលរបស់អតិថិជន និងស្ថិរភាពហិរញ្ញវត្ថុ ។
