១២ មិថុនា ២០១៧
កាលពីព្រឹកថ្ងៃទី១២ ខែមិថុនា ឆ្នាំ២០១៧ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអញ្ជើញចូលរួមក្នុងពិធីសំណេះសំណាលជាមួយមន្ត្រី-បុគ្គលិកធនាគារជាតិនៃកម្ពុជា សាខាខេត្តសៀមរាប ដើម្បីពិនិត្យអំពីស្ថានភាពទូទៅ និងប្រតិបត្តិការរបស់សាខានេះ ។ ក្នុងពិធីសំណេះសំណាលនេះ លោកនាយកសាខា បានរាយការណ៍ស្តីអំពីស្ថានភាពទូទៅនៃប្រតិបត្តិការរបស់សាខា និងស្ថានភាពប្រព័ន្ធធនាគារនៅក្នុងខេត្តទាំងមូល ជាពិសេស នៅឆមាសទី១ ឆ្នាំ២០១៧ ។ ក្នុងឱកាសនោះ ឯកឧត្តម ទេសាភិបាល មានមតិណែនាំនិងផ្តាំផ្ញើមួយចំនួនដល់មន្ត្រី-បុគ្គលិកធនាគារជាតិនៃកម្ពុជាសាខាខេត្តសៀមរាប ឱ្យបន្តគោរពវិន័យការងារនិងបទបញ្ជាផ្ទៃក្នុង គោរពតាមលក្ខន្តិកៈមន្ត្រី-បុគ្គលិកធនាគារជាតិនៃកម្ពុជា ពង្រឹងស្មារតីយកចិត្តទុកដាក់និងទទួលខុសត្រូវខ្ពស់ក្នុងការងារ ត្រូវតាមដានគ្រប់ប្រតិបត្តិការប្រព័ន្ធធនាគារទាំងមូល ជាពិសេស គ្រឹះស្ថានមីក្រូហិរញ្ញវត្ថុ និងត្រូវរក្សាសាមគ្គីភាពផ្ទៃក្នុង ដើម្បីចូលរួមចំណែករក្សាស្ថិរភាព និងអភិវឌ្ឍប្រព័ន្ធធនាគារនៅខេត្តសៀមរាបឱ្យកាន់តែរីកចម្រើន ។
