២៥ កក្កដា ២០១៧
កាលព្រឹកថ្ងៃទី២៥ ខែកក្កដា ឆ្នាំ២០១៧ ធនាគារជាតិនៃកម្ពុជាបានរៀបចំកិច្ចប្រជុំបូកសរុបលទ្ធផលបេសកកម្មមាត្រាទីIV របស់មូលនិធិរូបិយវត្ថុអន្តរជាតិ (IMF) ក្រោមអធិបតីភាព ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា និងលោក Markus Rodlauer អនុប្រធាននាយកដ្ឋានអាស៊ីប៉ាហ្វិក របស់មូលនិធិរូបិយវត្ថុអន្តរជាតិ។ បេសកកម្មមាត្រាទីIV របស់មូលនិធិរូបិយវត្ថុអន្តរជាតិត្រូវបានចាប់ផ្តើម ឡើងកាលពីថ្ងៃទី១២ ដល់ ២៥ ខែកក្កដា ឆ្នាំ២០១៧ នៅកម្ពុជាដើម្បីតាមដានស្ថានភាពសេដ្ឋកិច្ចកម្ពុជាសម្រាប់ឆ្នាំ២០១៧។
លោក Jarkko Turunen ប្រធានក្រុមបេសកកម្ម បានជម្រាបពីការវាយតម្លៃរបស់ IMF ថា កម្ពុជាបន្តមានកំណើនរឹងមាំក្នុងរង្វង់ ៧%នៅឆ្នាំ២០១៧ ជាមួយនិងកម្រិតអត្រាអតិផរណាទាបប្រមាណ៣%។ ទុនបម្រុងអន្តរជាតិបន្តកើនឡើង និងអាចធានាការនាំចូលទំនិញនិងសេវាបានប្រមាណ៥,៧ខែ។ ក្នុងវិស័យ ធនាគារ មូលនិធិរូបិយវត្ថុអន្តរជាតិបានវាយតម្លៃខ្ពស់ចំពោះការដាក់ចេញនូវវិធានការម៉ាក្រូប្រុងប្រយ័ត្នរបស់ធនាគារជាតិនៃកម្ពុជា ដែលបានរួមចំណែកក្នុងការកាត់បន្ថយកំណើនឥណទាន និងរក្សាស្ថិរភាព ហិរញ្ញវត្ថុ។ មូលនិធិរូបិយវត្ថុអន្តរជាតិជឿជាក់ថា កម្ពុជានឹងបន្តសម្រេចបាននូវសមិទ្ធផលសេដ្ឋកិច្ចថ្មីៗបន្ថែមទៀតលើអ្វីដែលសម្រេចបានក្នុងរយៈពេលប៉ុន្មាទសវត្សរ៍ចុងក្រោយ និងជំនះបញ្ហាប្រឈមនាពេលខាងមុខបានដោយជោគជ័យ។
ជាកិច្ចឆ្លើយតប ឯកឧត្តមទេសាភិបាល បានថ្លែងអំណរគុណយ៉ាងជ្រាលជ្រៅចំពោះរបស់មូលនិធិរូបិយវត្ថុអន្តរជាតិដែលបានតាមដានស្ថានភាពសេដ្ឋកិច្ចកម្ពុជា និងតែងតែគាំទ្ររាជរដ្ឋាភិបាលក្នុងការអនុវត្តគោលនយោបាយសេដ្ឋកិច្ចនិងជួយផ្តល់ជំនួយបច្ចេកទេសក្នុងការកសាងនិងអភិវឌ្ឍន៍សមត្ថភាព ជាពិសេសមន្ត្រីបុគ្គលិកធនាគារជាតិនៃកម្ពុជា។ ធនាគារជាតិនៃកម្ពុជានឹងយកការវាយតម្លៃពីស្ថានភាពម៉ាក្រូសេដ្ឋកិច្ចនិងហិរញ្ញវត្ថុរួមទាំងអនុសាសន៍ចម្បងៗនានា ដែលផ្តល់ដោយក្រុមបេសកកម្ម ធ្វើជាធាតុចូលទៅក្នុងការពង្រឹងការអនុវត្តគោលនយោបាយអភិវឌ្ឍន៍វិស័យធនាគារនាពេលខាងមុខ ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ឆ្នាំ២០១៦-២០២៥ របស់រាជរដ្ឋាភិបាល។
