៣០ វិចិ្ឆកា ២០១៧
នៅព្រឹកថ្ងៃព្រហស្បតិ៍ ១២កើត ខែមិគសិរ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៣០ ខែវិច្ឆិកា គ.ស. ២០១៧ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអញ្ជើញចូលរួមជាអធិបតីក្នុងសិក្ខាសាលាផ្សព្វផ្សាយ ស្តីពីវិស័យមីក្រូហិរញ្ញវត្ថុនៅកម្ពុជា នៅសាខាធនាគារជាតិនៃកម្ពុជា ខេត្តកំពង់ចាម។ សិក្ខាសាលានេះ ត្រូវបានរៀបចំឡើងក្នុងគោលបំណងបន្តផ្សព្វផ្សាយជូនភាគីពាក់ព័ន្ធ ជាពិសេសអាជ្ញាធរមូលដ្ឋាន អំពីការវិវឌ្ឍនថ្មីៗនៃវិស័យមីក្រូហិរញ្ញវត្ថុ បញ្ហាប្រឈម និងរួមគ្នាអនុវត្តដំណោះស្រាយដើម្បីឱ្យការអភិវឌ្ឍនៃវិស័យនេះកាន់តែមាននិរន្តរភាព នាពេលអនាគត។ សិក្ខាសាលានេះមានការអញ្ជើញជាកិត្តិយសរបស់ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម អភិបាលរង ស្ថាប័នតុលាការ ស្នងការនគរបាល កងរាជអាវុធហត្ថ មន្ទីរជុំវិញខេត្ត សហភាពសហព័ន្ធយុវជនកម្ពុជា (សសយក) ប្រចាំខេត្តកំពង់ចាម ក្រុមយុវជនកាយរិទ្ធខេត្តកំពង់ចាម និងជាពិសេសអាជ្ញាធរមូលដ្ឋានគ្រប់លំដាប់ថ្នាក់ទូទាំងខេត្ត សរុបប្រមាណ ៤០០នាក់។
