២៨ មិថុនា ២០១៨
នាថ្ងៃព្រហស្បត្តិ៍ ១រោច ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៨ ខែមិថុនា ឆ្នាំ២០១៨ នៅសាលប្រជុំនៃវិទ្យាស្ថានអប់រំជាតិ លោកជំទាវ ជា សិរី អគ្គនាយកបច្ចេកទេស និងជាតំណាងដ៏ខ្ពង់ខ្ពស់របស់ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានចូលរួមជាគណៈអធិបតីក្នុងពិធីផ្សព្វផ្សាយការដាក់ឱ្យប្រើប្រាស់ជាផ្លូវការ “កម្មវិធីសិក្សាលម្អិតគ្រប់មុខវិជ្ជានិងគ្រប់ភូមិសិក្សា” ក្រោមអធិបតីភាព ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ក្នុងឱកាសនេះផងដែរ លោកជំទាវ ជា សិរី ក៏បានទទួលយកសៀវភៅកម្មវិធីសិក្សាលម្អិតលើមុខវិជ្ជាចំនួន៥ គឺគណិតវិទ្យា គេហសេដ្ឋកិច្ច សិក្សាសង្គម សីលធម៌ពលរដ្ឋវិជ្ជា និងបំណិនជីវិតតាមមូលដ្ឋាន ដែលជាមុខវិជ្ជាសម្រាប់ដាក់បញ្ចូលកម្មវិធីចំណេះដឹងផ្នែកហិរញ្ញវត្ថុ ក្រោមកិច្ចសហការរវាងស្ថាប័នទាំង២។
ដោយសង្កេតឃើញពីសារៈសំខាន់នៃការអប់រំផ្នែកហិរញ្ញវត្ថុចំពោះការទទួលបាននិងការប្រើប្រាស់សេវាហិរញ្ញវត្ថុប្រកបដោយការទទួលខុសត្រូវ ដែលអាចលើកកម្ពស់ជីវភាពរស់នៅរបស់ប្រជាជន និង អភិវឌ្ឍសេដ្ឋកិច្ចជាតិ ធនាគារជាតិនៃកម្ពុជា និងក្រសួងអប់រំ យុវជន និងកីឡា បាននិងកំពុងសហការគ្នាលើគម្រោងដាក់បញ្ចូលចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅចាប់ពីថ្នាក់ទី១ ដល់ទី១២។ ភាគីទាំងពីរបានធ្វើការរួមគ្នាដើម្បី កំណត់នឹងកែសម្រួលកម្មវិធីសិក្សាលើមុខវិជ្ជាពាក់ព័ន្ធ។ ជាជំហានបន្ទាប់ ធនាគារជាតិនៃកម្ពុជា នឹងបន្តកិច្ចគាំទ្រដល់ក្រសួងក្នុងសរសេរសៀវភៅសិក្សាគោល និងបណ្តុះបណ្តាលគ្រូបង្គោលលើមុខវិជ្ជាពាក់ព័ន្ធទាំងនេះ ដើម្បីធានាប្រសិទ្ធិភាពនៃការអនុវត្ត ។
