២៨ មិថុនា ២០១៨
កាលពីព្រឹកថ្ងៃព្រហស្បតិ៍ ១រោច ខែបឋមាសាឍ ឆ្នាំច សំរិទ្ធិស័ក ព.ស.២៥៦២ ត្រូវនឹងថ្ងៃទី២៨ ខែមិថុនា ឆ្នាំ២០១៨ លោកជំទាវ ជា សិរី អគ្គនាយកបច្ចេកទេស ធនាគារជាតិនៃកម្ពុជា បានអនុញ្ញាតឱ្យ តំណាងមកពីសមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុនៅកម្ពុជា (CMA) ជួបពិភាក្សាការងារពាក់ព័ន្ធនឹងការបណ្តុះបណ្តាលធនធានមនុស្សនៅក្នុងវិស័យធនាគារ ដោយមានប្រធានបទសំខាន់ៗមួយចំនួនដូចជា៖ i/-រចនាសម្ព័ន្ធគ្រប់គ្រងរបស់វិទ្យាស្ថានធនាគារនិងហិរញ្ញវត្ថុ ii/- ក្របខណ្ឌសមត្ថភាពសម្រាប់វិស័យធនាគារនិងហិរញ្ញវត្ថុទាំងមូល iii/- ការបង្កើតកម្មវិធីសិក្សាសម្រាប់រៀបចំវគ្គ
បណ្តុះបណ្តាលលើប្រធានបទពាក់ព័ន្ធនឹងការប្រតិបត្តិតាម ការប្រឆាំងការសំអាតប្រាក់និងហិរញ្ញប្បទានភេរវកម្ម ការវាយតម្លៃឥណទាន ការគ្រប់គ្រងហានិភ័យ សវនកម្មផ្ទៃក្នុង ហិរញ្ញវត្ថុពាណិជ្ជកម្ម ជាដើម និងiv/- ការបង្កើតមូលនិធិអភិវឌ្ឍធនធានមនុស្ស។ កិច្ចពិភាក្សានេះឆ្លុះបញ្ចាំងពីកិច្ចខិតខំប្រឹងប្រែងពង្រឹងគុណភាពធនធានមនុស្ស ក្នុងវិស័យធនាគារនៅកម្ពុជា ឲ្យមានលក្ខណៈប្រហាក់ប្រហែលនឹងធនធានមនុស្សក្នុងវិស័យធនាគារនៅក្នុងតំបន់ និងកិច្ចសហប្រតិបត្តិការរវាងធនាគារជាតិនៃកម្ពុជា ដែលជាអាជ្ញាធរអាណាព្យាបាល និងវិស័យឯកជនក្នុងប្រព័ន្ធធនាគារ។
