១៧ សីហា ២០១៨
នៅថ្ងៃសុក្រ ៦កើត ខែស្រាពណ៍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៧ ខែសីហា ឆ្នាំ២០១៨ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានអញ្ជើញជាអធិបតីបើកសិក្ខាសាលាស្តីពី “សារៈសំខាន់នៃការចងក្រងស្ថិតិ” ដែលសហការរៀបចំដោយធនាគារជាតិនៃកម្ពុជា និងវិទ្យាស្ថានជាតិស្ថិតិ នៃក្រសួងផែនការ។ សិក្ខាសាលានេះមានការចូលរួមពីមន្ត្រីបុគ្គលិកនៃក្រសួង-ស្ថាប័នរបស់រាជរដ្ឋាភិបាល ស្ថាប័នហិរញ្ញវត្ថុអន្តរជាតិ គ្រឹះស្ថានធនាគារនិងហិរញ្ញវត្ថុ សមាគមធុរកិច្ច គ្រឹះស្ថានអប់រំ និងវិស័យឯកជនផ្សេងទៀតប្រមាណ ២០០នាក់។ គោលបំណងសំខាន់នៃសិក្ខាសាលានេះ ដើម្បីផ្សព្វផ្សាយឱ្យបានទូលំទូលាយអំពីអត្ថប្រយោជន៍នៃការចងក្រង និងការប្រើប្រាស់ទិន្នន័យស្ថិតិសេដ្ឋកិច្ចក្នុងការរៀបចំគោលនយោបាយម៉ាក្រូសេដ្ឋកិច្ច ផែនការនិងយុទ្ធសាស្ត្រអភិវឌ្ឍន៍ និងការសិក្សាស្រាវជ្រាវនានា ដែលពាក់ព័ន្ធនឹងសេដ្ឋកិច្ចនិងហិរញ្ញវត្ថុ តាមរយៈការធ្វើបទបង្ហាញពីសំណាក់វាគ្មិនដែលពោរពេញដោយចំណេះដឹងនិងបទពិសោធន៍។
