២៩ សីហា ២០១៨
នៅថ្ងៃពុធ ៣រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៩ ខែសីហា ឆ្នាំ២០១៨ វេលាម៉ោង ១១:០០នាទីព្រឹក ឯកឧត្តម ជា ចាន់តូ អគ្គទេសាភិបាល ធនាគារជាតិនៃកម្ពុជា បានទទួលជួបសម្តែងការគួរសមនិងពិភាក្សាការងារជាមួយគណៈប្រតិភូនៃតំបន់ស្វយ័តនៃខេត្ត Guangxi Zhaung ប្រទេសចិន ដែលដឹកនាំដោយ ឯកឧត្តម Ding Xiangqun អនុប្រធាននៃរដ្ឋាភិបាលរបស់តំបន់ស្វយ័តនៃខេត្ត Guangxi Zhaung អញ្ជើញមកបំពេញទស្សនកិច្ចនៅប្រទេសកម្ពុជា ចាប់ពីថ្ងៃទី២៧-៣០ ខែសីហា ឆ្នាំ២០១៨។ ការបំពេញទស្សនកិច្ចក្នុងពេលនេះ ក្នុងគោលបំណងលើកកម្ពស់ការធ្វើពាណិជ្ជកម្មនិងវិនិយោគរវាងប្រទេសកម្ពុជា និងខេត្ត Guangxi Zhaung នៃសាធារណរដ្ឋប្រជាមានិតចិន។
នៅក្នុងកិច្ចប្រជុំនេះ ឯកឧត្តម អគ្គទេសាភិបាល បានជម្រាបជូនពីស្ថានភាពសេដ្ឋកិច្ចនិងការអភិវឌ្ឍរីកចម្រើនរបស់ប្រទេសកម្ពុជា និងទំនាក់ទំនងសេដ្ឋកិច្ចនិងពាណិជ្ជកម្មរវាងប្រទេសទាំងពីរ។ នៅប្រទេសកម្ពុជា វិនិយោគិនចិនជាច្រើនបានមកវិនិយោគលើវិស័យសំខាន់ៗមួយចំនួនដូចជា វិស័យកាត់ដេរ សំណង់ កសិកម្ម ក៏ដូចជាវិស័យធនាគារនិងហិរញ្ញវត្ថុ ដែលសព្វថ្ងៃមានធនាគារចិនពីរកំពុងធ្វើប្រតិបត្តិការនៅប្រទេសកម្ពុជា គឺធនាគារ អាយ ស៊ី ប៊ី ស៊ី និងធនាគារចិនសាខាភ្នំពេញ។
ឯកឧត្តម Ding Xiangqun អនុប្រធាននៃរដ្ឋាភិបាលរបស់តំបន់ស្វយ័តនៃខេត្ត Guangxi Zhaung ក៏បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសកម្ពុជាមានការអភិវឌ្ឍរីកចម្រើនគួរឱ្យកត់សម្គាល់។ ការវិនិយោគរបស់វិនិយោគិនចិននៅប្រទេសកម្ពុជា ក៏មានការកើនឡើងគួរឱ្យកត់សម្គាល់ទាំងទំហំនិងប្រតិបត្តិការ។ បើគិតត្រឹមឆ្នាំ២០១៧ ការនាំចេញពីខេត្ត GuangXi Zhaung មកកម្ពុជា មានប្រមាណ ៦៩,៣ លានដុល្លារអាមេរិក ហើយមានសហគ្រាសធំៗចំនួន២៨ បានមកវិនិយោគនៅប្រទេសកម្ពុជា ដែលមានទឹកប្រាក់សរុបប្រមាណ ១ប៊ីលានដុល្លារអាមេរិក។ រីឯ ប្រតិបត្តិការឆ្លងដែនរវាងប្រាក់រៀលនិងប្រាក់យ៉ន់ក៏មានការអភិវឌ្ឍរីកចម្រើនផងដែរ បន្ទាប់ពីបានសម្ពោធដាក់ឱ្យដំណើរការដោះដូររវាងប្រាក់រៀលនិងប្រាក់យ៉ន់ក្នុងទីផ្សារអន្តរធនាគារនៅតំបន់ស្វយ័ត Guangxi Zhaung ប្រទេសចិន កាលពីខែកញ្ញា ឆ្នាំ២០១៧។ ដោយសារខេត្ត GuangXi Zhaung ជាចំណុចកណ្តាលសម្រាប់តភ្ជាប់រវាងប្រទេសចិន និងប្រទេសតំបន់អាស៊ាន រដ្ឋបាលតំបន់ស្វយ័តនៃខេត្តនេះ បាននិងកំពុងដើរតួនាទីស្នូលក្នុងការពង្រីកកិច្ចសហប្រតិបត្តិការរវាងប្រទេសចិន និងតំបន់អាស៊ាន។
នៅក្នុងជំនួបនេះ ឯកឧត្តម Ding Xiangqun បានសំណូមពរបន្តពង្រឹងទំនាក់ទំនងនិងកិច្ចសហប្រតិបត្តិការលើគ្រប់វិស័យ ដើម្បីជំរុញការអភិវឌ្ឍឱ្យកាន់តែប្រសើរឡើងស្របតាមយុទ្ធសាស្រ្ត ខ្សែក្រវាត់មួយ-ផ្លូវមួយ។ ឆ្លៀតក្នុងឱកាសនេះ ឯកឧត្តម ក៏មានបំណងមកអញ្ជើញ ឯកឧត្តម ទេសាភិបាល និងគណៈប្រតិភូធនាគារជាតិនៃកម្ពុជា ដោយផ្ទាល់ ដើម្បីចូលរួមកិច្ចវេទិកាកំពូលចិន-អាស៊ានលើកទី១០ ស្តីពីកិច្ចសហប្រតិបត្តិការហិរញ្ញវត្ថុនិងការអភិវឌ្ឍ ដែលនឹងប្រព្រឹត្តទៅនៅខែកញ្ញាខាងមុខនេះ។
