០៤ មេសា ២០១៩
នាថ្ងៃព្រហស្បតិ៍ ១៥រោច ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤ ខែមេសា ឆ្នាំ២០១៩ នៅខេត្តឈាងរ៉ៃ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា និងឯកឧត្តម Veerathai Santiprabhob ទេសាភិបាល ធនាគារកណ្តាលថៃ បានអញ្ជើញចូលរួមជាអធិបតីក្នុងឱកាសនៃការបង្ហាញពី «អន្តរប្រតិបត្តិការនៃការទូទាត់តាមប្រព័ន្ធ QR (Interoperable QR Payment)» រវាង Siam Commercial Bank (SCB) របស់ប្រទេសថៃ និងសាខារបស់ខ្លួននៅកម្ពុជា ដើម្បីបន្តការសហការដ៏រឹងមាំក្នុងការតភ្ជាប់ប្រព័ន្ធទូទាត់សងប្រាក់រវាងប្រទេសទាំងពីរ។ អន្តរប្រតិបត្តិការនៃការទូទាត់សងប្រាក់តាមប្រព័ន្ធ QRនេះត្រូវបានធ្វើឡើងតាមស្តង់ដារ EMV ដែលនឹងអាចសម្រួលដល់ការទូទាត់រាយឆ្លងដែនរវាងបុគ្គលនិងពាណិជ្ជករក្នុងប្រទេសទាំងពីរ។ ជាមួយនឹងសេវាកម្មនេះ ភ្ញៀវទេសចរថៃនឹងអាចប្រើប្រាស់កម្មវិធីធនាគារចល័តក្នុងទូរសព្ទដៃ ដើម្បីស្កេន QR code និងធ្វើការទូទាត់សងប្រាក់ទៅកាន់ពាណិជ្ជករកម្ពុជា។ ខណៈដែលការបង្ហាញនៅថ្ងៃនេះជាការបង្ហាញសាកល្បងអំពីការទូទាត់តាមរយៈការផ្ទេរប្រាក់ក្នុងប្រព័ន្ធធនាគារ ប្រទេសទាំងពីរនឹងបន្តធ្វើការជាមួយគ្នាក្នុងការពង្រីកបណ្តាញទូទាត់សងប្រាក់ និងធ្វើឱ្យការទូទាត់ឆ្លងដែនតាមប្រព័ន្ធ QR អាចធ្វើឡើងដោយធនាគារភាគច្រើននៅប្រទេសកម្ពុជានិងថៃបានយ៉ាងរលូន ជាមួយនឹងការអភិវឌ្ឍនៃហេដ្ឋារចនាសម្ព័ន្ធអន្តរប្រតិបត្តិការនេះ។
