១៨ កញ្ញា ២០១៩
នាព្រឹកថ្ងៃពុធ ៥រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៨ ខែកញ្ញា ឆ្នាំ២០១៩ នៅធនាគារជាតិនៃកម្ពុជា ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអនុញ្ញាតឱ្យក្រុមបេសកកម្មពិគ្រោះយោបល់របស់ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដឹកនាំដោយ លោក Toshinori Doi ប្រធានការិយាល័យ AMRO ថ្មី ដែលទើបចូលកាន់តំណែង ចូលជួបសម្តែងការគួរសមនិងជម្រាបជូនពីលទ្ធផលនៃបេសកកម្មតាមដានស្ថានភាពសេដ្ឋកិច្ចកម្ពុជា ដែលបានធ្វើឡើងចាប់ពីថ្ងៃទី១០ ដល់ថ្ងៃទី១៨ ខែកញ្ញា ឆ្នាំ២០១៩។ លោក Toshinori Doi បានសាទរចំពោះវឌ្ឍនភាពនៃសេដ្ឋកិច្ចកម្ពុជា ដែលរាជរដ្ឋាភិបាលសម្រេចបាន។ ជារួម AMRO បានពិនិត្យឃើញថាសេដ្ឋកិច្ចកម្ពុជាសម្រេចបានសមិទ្ធផលល្អប្រសើរក្នុងឆ្នាំ២០១៨ ហើយសម្រាប់ឆ្នាំ២០១៩នេះ AMRO រំពឹងថាសេដ្ឋកិច្ចកម្ពុជាបន្តមានកំណើនរឹងមាំក្នុងអត្រាប្រមាណ ៧,១% ជាមួយនឹងអត្រាអតិផរណាទាប និងស្ថិរភាពនៃវិស័យធនាគារ។ ឯកឧត្តម ទេសាភិបាល បានថ្លែងអំណរគុណចំពោះការិយាល័យ AMRO ដែលតែងតែរួមចំណែកយ៉ាងសំខាន់ក្នុងការជួយតាមដានស្ថានភាពសេដ្ឋកិច្ចកម្ពុជា ព្រមទាំងពង្រឹងការកសាងសមត្ថភាពជំនាញរបស់មន្ត្រីបុគ្គលិកធនាគារជាតិនៃកម្ពុជា តាមរយៈការផ្តល់ការងារហាត់ការនៅការិយាល័យ AMRO កន្លងមក។
