៣០ កញ្ញា ២០១៩
កាលពីព្រឹកថ្ងៃចន្ទ ២កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣០ ខែកញ្ញា ឆ្នាំ២០១៩ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា បានអនុញ្ញាតឱ្យក្រុមបេសកកម្មមាត្រា IV របស់មូលនិធិរូបិយវត្ថុអន្តរជាតិ (IMF) ដែលដឹកនាំដោយ លោក Jarkko Turunen ប្រធានក្រុមបេសកកម្មសម្រាប់កម្ពុជា ចូលជួបសម្តែងការគួរសម និងពិភាក្សាការងារ នៅធនាគារជាតិនៃកម្ពុជា។ បេសកកម្មមាត្រា IV ត្រូវបាន IMF ធ្វើឡើងជារៀងរាល់ឆ្នាំសម្រាប់ប្រទេសជាសមាជិក ដើម្បីពិនិត្យនិងតាមដានស្ថានភាពសេដ្ឋកិច្ចកម្ពុជា និងផ្តល់អនុសាសន៍សម្រាប់ការអនុវត្តគោលនយោបាយសេដ្ឋកិច្ច។
ឯកឧត្តម ទេសាភិបាល បានជម្រាបជូន គណៈប្រតិភូអំពីការរីកចម្រើននៃសេដ្ឋកិច្ចនាពេលកន្លងមក ជាពិសេសនៅឆ្នាំ២០១៨ ដែលកម្ពុជាសម្រេចបានក្នុងអត្រា ៧,៥%។ នៅឆ្នាំ២០១៩ រាជរដ្ឋាភិបាលរំពឹងថា កំណើននឹងបន្តកើនក្នុងរង្វង់ ៧,១% ដែលជាកម្រិតខ្ពស់នៅក្នុងតំបន់។ ទន្ទឹមនេះ ស្ថានភាពម៉ាក្រូសេដ្ឋកិច្ចមានស្ថិរភាពល្អប្រសើរ ដោយអតិផរណានៅឆមាសទី១ មានអត្រា ១,៩% ហើយរំពឹងថាមានកម្រិត ២,២% សម្រាប់ឆ្នាំ២០១៩។ រាជរដ្ឋាភិបាលបានដាក់ចេញនូវយុទ្ធសាស្ត្រគាំទ្រដល់កំណើនសេដ្ឋកិច្ចក្នុងស្ថានភាពមិនច្បាស់លាស់នៃកំណើនសេដ្ឋកិច្ចពិភពលោក ជាពិសេសការធ្វើពិពិធកម្មមូលដ្ឋាននៃកំណើន ការពង្រឹងការសម្រួលដល់ការនាំចេញនិងនាំចូល និងការបង្កើនបរិយាកាសអំណោយផលដល់ការវិនិយោគ ។ល។ នៅក្នុងវិស័យធនាគារ គ្រឹះស្ថានធនាគារនិងហិរញ្ញវត្ថុមានសុខភាពល្អប្រសើរ និងបានរួមចំណែកគាំទ្រការអភិវឌ្ឍសេដ្ឋកិច្ចជាតិ។ ធនាគារជាតិនៃកម្ពុជាបានពង្រឹងការត្រួតពិនិត្យ និងបទប្បញ្ញត្តិ ជាមួយនឹងការដាក់ចេញជាបន្តបន្ទាប់នូវគោលនយោបាយម៉ាក្រូប្រុងប្រយ័ត្ន ការបោះផ្សាយរបាយការណ៍ស្ថិរភាពហិរញ្ញវត្ថុ និងពង្រឹងបណ្តាញការពារស្ថិរភាពធនាគារឱ្យបានរឹងមាំស្របតាមស្តង់ដារអន្តរជាតិ។
ឯកឧត្តម ទេសាភិបាល ក៏បានថ្លែងអំណរគុណ IMF ដែលបានគាំទ្រគោលនយោបាយរាជរដ្ឋាភិបាល ក្នុងការអភិវឌ្ឍសេដ្ឋកិច្ចកម្ពុជា ការជួយកសាងសមត្ថភាពនិងផ្តល់ជំនួយបច្ចេកទេសដល់កម្ពុជា។
