១៨ វិចិ្ឆកា ២០១៩
នាព្រឹកថ្ងៃចន្ទ ៧រោច ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១៨ ខែវិច្ឆិកា ឆ្នាំ២០១៩ ដោយបានទទួលការអនុញ្ញាតដ៏ខ្ពង់ខ្ពស់ពី ឯកឧត្តម ទេសាភិបាល ធនាគារជាតិនៃកម្ពុជា លោក គិត សុវណ្ណារិទ្ធ អគ្គនាយករងត្រួតពិនិត្យទី១ ធនាគារជាតិនៃកម្ពុជា បានដឹកនាំក្រុមការងារ សហការជាមួយសាលាស្រុកស្ទោង នៃខេត្តកំពង់ធំ រៀបចំសិក្ខាសាលាថ្នាក់ស្រុក ស្តីពី “វិស័យមីក្រូហិរញ្ញវត្ថុនៅកម្ពុជា”។ សិក្ខាសាលានេះមានការចូលរួមពី លោក ណែត សារី អភិបាលនៃគណៈអភិបាលស្រុកស្ទោង និង លោក ដុស ឌីន សមាជិកក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ព្រមទាំង ប្រធានក្រុមប្រឹក្សាស្រុក មន្ត្រីគ្រឹះស្ថានធនាគារនិងមីក្រូហិរញ្ញវត្ថុ អាជ្ញាធរមូលដ្ឋានស្រុកស្ទោង និងប្រជាពលរដ្ឋក្នុងស្រុកស្ទោង ចំនួនប្រមាណ ៦០០នាក់។ សិក្ខាសាលានេះត្រូវបានរៀបចំទ្បើងក្នុងគោលបំណង ១/- ផ្សព្វផ្សាយអំពីប្រវត្តិនៃការអភិវឌ្ឍវិស័យមីក្រូហិរញ្ញវត្ថុនៅកម្ពុជា ២/- ច្បាប់និងបទប្បញ្ញត្តិពាក់ព័ន្ធនានា ៣/- សេវាកម្មរបស់គ្រឹះស្ថានធនាគារនិងហិរញ្ញវត្ថុដែលមានអាជ្ញាប័ណ្ណស្របច្បាប់ ៤/- បញ្ហាប្រឈមនៃវិស័យមីក្រូហិរញ្ញវត្ថុនៅកម្ពុជា ៥/- ស្វែងរកដំណោះស្រាយ និងឆ្លើយតបសំណូមពរ របស់ប្រជាពលរដ្ឋ និងអាជ្ញាធរមូលដ្ឋាន ចំពោះការប្រើប្រាស់សេវាកម្មមីក្រូហិរញ្ញវត្ថុ។ លើសពីនេះ សិក្ខាសាលាបានបង្កើនទំនាក់ទំនងនិងកិច្ចសហការល្អ រវាងអាជ្ញាធរមូលដ្ឋាននិងភាគីពាក់ព័ន្ធនានា ជាពិសេស ជាមួយធនាគារជាតិនៃកម្ពុជា ដើម្បីបន្តក្តាប់ឱ្យបាននូវស្ថានភាពជាក់ស្តែងរបស់ប្រជាជន ការប្រើប្រាស់សេវាមីក្រូហិរញ្ញវត្ថុ និងធ្វើយ៉ាងណាបញ្ចៀសការកេងប្រវ័ញ្ចតាមរយៈការប្រើប្រាស់សេវាកម្ចីដែលមិនមានអាជ្ញាប័ណ្ណត្រឹមត្រូវ។
