២៧ វិចិ្ឆកា ២០១៩
នាថ្ងៃពុធ ១កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៧ ខែវិច្ឆិកា ឆ្នាំ២០១៩ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជាបានអញ្ជើញចូលរួមកម្មវិធីភាពជាអ្នកដឹកនាំជាស្ត្រីរបស់មជ្ឈមណ្ឌលភាពជាអ្នកដឹកនាំនិងអភិបាលកិច្ច Iclif ក្រោមប្រធានបទស្ដីពី “Women of the World: Be the Change” នៅទីក្រុងបាងកក ប្រទេសថៃ។ កម្មវិធីនេះត្រូវបានធ្វើឡើងក្នុងគោលបំណងផ្ដល់ឱកាសដល់អ្នកដឹកនាំជាស្ត្រីចូលរួមចែករំលែកនូវបទពិសោធន៍អំពីយុទ្ធសាស្ត្រនិងភាពជាអ្នកដឹកនាំ និងការទទួលបានចំណេះដឹងថ្មីៗ ដែលទាក់ទងនឹងសមភាពយេនឌែរនិងបរិបទថ្មីៗរបស់ពិភពលោក ដែលនឹងជួយជំរុញស្ត្រីឱ្យក្លាយទៅជាអ្នកដឹកនាំដែលមានសមត្ថភាពខ្ពស់។ នាឱកាសនោះ លោកជំទាវ អគ្គនាយកបច្ចេកទេសបានចែករំលែកបទពិសោធន៍ស្ដីពីភាពជាអ្នកដឹកនាំដល់សិក្ខាកាមចូលរួមដែលជាស្ត្រីមានសក្ដានុពលមកពីបណ្ដាប្រទេសនៅក្នុងតំបន់អាស៊ី ដោយលោកជំទាវបានលើកទឹកចិត្តដល់សិក្ខាកាមក្នុងការកំណត់គោលដៅការងារឱ្យបានជាក់លាក់ និងតស៊ូព្យាយាមដើម្បីសម្រេចភារកិច្ចប្រកបដោយប្រសិទ្ធភាពខ្ពស់។
