០៣ ធ្នូ ២០១៩
នៅថ្ងៃអង្គារ ៧កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣ ខែធ្នូ ឆ្នាំ២០១៩ ធនាគារជាតិនៃកម្ពុជាបានរៀបចំសិក្ខាសាលាចែករំលែកបទពិសោធន៍ស្តីពី យុទ្ធសាស្ត្រផ្នែកទំនាក់ទំនង ក្រោមអធិបតីភាពរបស់ លោកជំទាវ ជា សិរី អគ្គនាយកបច្ចេកទេសនៃធនាគារជាតិនៃកម្ពុជា និងលោកជំទាវ Chantavarn Sucharitakul ឧបការីទេសាភិបាលនៃធនាគារកណ្តាលថៃ។ សិក្ខាសាលានេះមានការចូលរួមពីថ្នាក់ដឹកនាំនិងមន្ត្រី-បុគ្គលិកធនាគារជាតិនៃកម្ពុជាដែលសុទ្ធតែជាមន្ត្រីទំនាក់ទំនងនៃនាយកដ្ឋាននិងអគ្គនាយកដ្ឋានរបស់ធនាគារជាតិនៃកម្ពុជាប្រមាណ ៤០នាក់ និងមានគោលបំណងបង្កើនការយល់ដឹង និងចែករំលែកយុទ្ធសាស្ត្រ បទពិសោធន៍ និងការអនុវត្តពាក់ព័ន្ធនឹងផ្នែកទំនាក់ទំនងទាំងខាងក្នុងនិងខាងក្រៅរបស់ធនាគារកណ្តាលថៃ ព្រមទាំងបានលើកឡើងពីបញ្ហាប្រឈមនិងអនុសាសន៍ដ៏មានសារៈសំខាន់មួយចំនួន។
លោកជំទាវ ឧបការីទេសាភិបាលនៃធនាគារកណ្តាលថៃ បានលើកឡើងថា ក្រៅពីការអនុវត្តមុខងារស្នូល ធនាគារកណ្តាលក៏មានតួនាទីស្តាប់មតិពីភាគីពាក់ព័ន្ធនៅមុនពេលនិងក្រោយពេលដាក់ចេញគោលនយោបាយថ្មី និងត្រូវបកស្រាយពីគោលបំណងនិងមូលហេតុចំពោះការសម្រេចចិត្តនោះ ដើម្បីធានាឱ្យបាននូវតម្លាភាពនិងសេចក្តីទុកចិត្តរបស់សាធារណជន និងកាត់បន្ថយការយល់ខុសនានាដែលអាចកើតឡើង។
