០៦ ធ្នូ ២០១៩
នាព្រឹកថ្ងៃសុក្រ ១០កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៦ ខែធ្នូ ឆ្នាំ២០១៩ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានដឹកនាំកិច្ចប្រជុំជាមួយសមាគមមីក្រូហិរញ្ញវត្ថុកម្ពុជា ដើម្បីស្តាប់លទ្ធផលបឋមនៃការសិក្សាស្រាវជ្រាវលើផលប៉ះពាល់នៃគោលនយោបាយការកំណត់ពិដានអត្រាការប្រាក់ ដោយលោក Daiju Aiba នៃវិទ្យាស្ថានស្រាវជ្រាវ JICA។ ការសិក្សានេះត្រូវបានធ្វើឡើងដោយផ្អែកលើទិន្នន័យផ្នែកផ្គត់ផ្គង់ ដែលផ្តល់ដោយសមាគមមីក្រូហិរញ្ញវត្ថុកម្ពុជា និងការធ្វើបទសម្ភាសន៍ជាមួយគ្រឹះស្ថានមីក្រូហិរញ្ញវត្ថុ ព្រមទាំងទិន្នន័យផ្នែកតម្រូវការ ដែលបានមកពីការសម្ភាសន៍អតិថិជនចំនួន ១.០០០នាក់ ក្នុងខេត្តចំនួន ៥ មានដូចជា បាត់ដំបង កណ្តាល កំពង់ស្ពឺ កំពត និងក្រចេះ ក្នុងខែសីហា-កញ្ញា ឆ្នាំ២០១៩។ លទ្ធផលបឋមបង្ហាញថា ពិដានអត្រាការប្រាក់មានឥទ្ធិពលដល់ឥណទានរបស់គ្រឹះស្ថានមីក្រូហិរញ្ញវត្ថុ ក្នុងនោះទំហំឥណទានជាមធ្យមមានការកើនឡើង ចំណែកចំនួនអ្នកខ្ចីប្រាក់បានថយចុះ។ អង្គប្រជុំបានទទួលធាតុចូលរួមមួយចំនួនពីគ្រឹះស្ថានមីក្រូហិរញ្ញវត្ថុនិងអ្នកចូលរួម ដើម្បីពង្រីកការសិក្សាឱ្យកាន់តែស៊ីជម្រៅ ក្នុងគោលបំណងដាក់ចេញនូវគោលនយោបាយសមស្របនាពេលអនាគត។
