១៦ មករា ២០២០
នៅថ្ងៃព្រហស្បតិ៍ ៨រោច ខែបុស្ស ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៦ ខែមករា ឆ្នាំ២០២០ លោកជំទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជា បានចូលរួមជាអធិបតីក្នុងសិក្ខាសាលាផ្សព្វផ្សាយស្តីពី “ការលើកកម្ពស់ចំណេះដឹងផ្នែកហិរញ្ញវត្ថុសម្រាប់ស្ត្រី និងសហគ្រិនស្ត្រី”។ ការរៀបចំសិក្ខាសាលានេះ គឺជាការចាប់ផ្តើមអនុវត្តគម្រោងកិច្ចសហប្រតិបត្តិការនិងភាពជាដៃគូរវាង ធនាគារជាតិនៃកម្ពុជា ក្រសួងកិច្ចការនារី និង ក្រុមហ៊ុន វីសា (VISA) ក្នុងគោលបំណងផ្សព្វផ្សាយចំណេះដឹងផ្នែកហិរញ្ញវត្ថុដល់ស្ត្រី និងសហគ្រិនស្ត្រី លើប្រធានបទសំខាន់ៗដូចជា សហគ្រិនភាព ចំណេះដឹងនិងការគ្រប់គ្រងផ្នែកហិរញ្ញវត្ថុនិងការទទួលបានសេវាហិរញ្ញវត្ថុដែលអាចទុកចិត្តបាន ព្រមទាំងចំណេះដឹងផ្នែកហិរញ្ញវត្ថុដែលទាក់ទងនឹងឌីជីថល។ លទ្ធផលដែលទទួលបានពីសិក្ខាសាលានេះនឹងត្រូវប្រេីប្រាស់ជាធាតុចូលក្នុងការបង្កេីតជាប្រធានបទសម្រាប់បង្រៀនគ្រូបង្គោល មន្ត្រី-បុគ្គលិករបស់ក្រសួងកិច្ចការនារី និងស្ត្រីសហគ្រិននៅតាមមូលដ្ឋានជុំវិញប្រធានបទពាក់ព័ន្ធចំនណេះដឹងផ្នែកហិរញ្ញវត្ថុ។ កិច្ចសហប្រតិបត្តិការនេះនឹងចូលរួមជំរុញការអនុវត្ត យុទ្ធសាស្ត្រជាតិស្តីពី បរិយាបន្នហិរញ្ញវត្ថុ ឆ្នាំ២០១៩-២០២៥ ក្នុងការកាត់បន្ថយអត្រាស្ត្រីមិនទាន់ទទួលបានសេវាហិរញ្ញវត្ថុឱ្យបានពាក់កណ្តាលពី ២៧% មក ១៣%។
