២៥ មិថុនា ២០២២
តបតាមការអញ្ជើញរបស់លោកបណ្ឌិត Agustín Carstens នាយកគ្រប់គ្រងធនាគារសម្រាប់ការទូទាត់អន្តរជាតិ (BIS) លោកជំទាវបណ្ឌិត ជា សិរី ឧបការីទេសាភិបាល និងជាអគ្គនាយកបច្ចេកទេសនៃធនាគារជាតិនៃកម្ពុជា បានអញ្ជើញចូលរួមក្នុងកិច្ចប្រជុំប្រចាំឆ្នាំលើកទី៩២ របស់ BIS ចាប់ពីថ្ងៃសៅរ៍ ១១រោច ដល់ថ្ងៃអាទិត្យ ១២រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥-២៦ ខែមិថុនា ឆ្នាំ២០២២ នៅទីក្រុងបាសែល ប្រទេសស្វ៊ីស។ កិច្ចប្រជុំកំពូលនេះត្រូវបានរៀបចំជារៀងរាល់ឆ្នាំដោយមានការចូលរួមពីទេសាភិបាលធនាគារកណ្តាលជុំវិញពិភពលោក ប្រធានស្ថាប័នអន្តរជាតិសំខាន់ៗ រួមទាំងភ្ញៀវកិត្តិយសជាច្រើនរូបទៀត ដើម្បីពិភាក្សាលើបញ្ហាប្រឈមថ្មីៗរបស់ធនាគារកណ្តាល និងស្វែងរកដំណោះស្រាយនានា ព្រមទាំងអនុសាសន៍សម្រាប់ការដាក់ចេញគោលនយោបាយឆ្លើយតបនឹងបញ្ហាប្រឈមទាំងនោះ។ សម្រាប់ឆ្នាំ២០២២ នេះ កិច្ចប្រជុំប្រចាំឆ្នាំ បានផ្តោតសំខាន់ទៅលើតួនាទីរបស់ធនាគារកណ្តាលក្នុងការឆ្លើយតបនឹងហានិភ័យហិរញ្ញវត្ថុទាក់ទងនឹងការប្រែប្រួលអាកាសធាតុ និងបញ្ហាអតិផរណាខ្ពស់ក្នុងបរិការណ៍ដែលពិភពលោកកំពុងប្រឈមនឹងភាពមិនប្រាកដប្រជា។
