១៨ កក្កដា ២០១៦
នៅល្ងាចថ្ងៃទី១៨ ខែកក្កដា ឆ្នាំ២០១៦ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានអនុញ្ញាតឱ្យលោក Marzunisham Omar នាយកប្រតិបត្តិនៃការិយាល័យអាស៊ីអាគ្នេយ៍ប្រចាំ មូលនិធិរូបិយវត្ថុអន្តរជាតិ (IMF) ចូលជួបសម្តែងការគួរសមនិងពិភាក្សាការងារ ។ លោក Omar បានមកបំពេញទស្សនកិច្ចនៅកម្ពុជាក្នុងឱកាសដែលក្រុមបេសកកម្មមាត្រាទី IV របស់ IMF បានមក វាយតម្លៃប្រចាំឆ្នាំស្ថានភាពសេដ្ឋកិច្ចនិងហិរញ្ញវត្ថុកម្ពុជា ដើម្បីពិនិត្យមើលវឌ្ឍនភាពជាក់ស្តែងនៅកម្ពុជា ។ លោក Omar បានអបអរសាទររាជរដ្ឋាភិបាលកម្ពុជានិងធនាគារជាតិនៃកម្ពុជា ដែលបានខិតខំអភិវឌ្ឍ សេដ្ឋកិច្ច និងប្រព័ន្ធធនាគារឱ្យបានរីកចម្រើនយ៉ាឆាប់រហ័សប្រកបដោយភាពរឹងមាំនិងចីរភាព ។ លោកក៏បានគាំទ្រការវាយតម្លៃដោយសុទិដ្ឋិនិយមរបស់ IMF ចំពោះសន្ទុះកំណើនសេដ្ឋកិច្ចកម្ពុជា ហើយលោកក៏ត្រៀមខ្លួនដើម្បីរួមចំណែកគាំទ្រក្នុងដំណើរការអភិវឌ្ឍសេដ្ឋកិច្ចកម្ពុជា ជាពិសេសតាមរយៈ ការពង្រឹងការផ្តល់ជំនួយបច្ចេកទេសរបស់ IMF មកកម្ពុជា ក្នុងគោលដៅកសាងសមត្ថភាពធនធាន មនុស្ស និងលើកកម្ពស់ការអភិវឌ្ឍសេដ្ឋកិច្ច និងប្រព័ន្ធធនាគារកម្ពុជា ។
